Desde a súa fundación, Agrasar Editores, foi un piar na preservación e promoción da cultura e o patrimonio literario de Monforte de Lemos e a súa comarca, dedicándose exclusivamente a obras relacionadas coa rexión. Esta especialización consolidou á editorial como un referente en Galicia, cun catálogo centrado en autores e obras que exploran a riqueza histórica e cultural do lugar.

Con todo, co lanzamento de L∃EMOS, a editorial busca transcender o seu enfoque rexional sen renunciar á súa identidade, á vez que ofrece a escritores de diversas temáticas a posibilidade de publicar baixo o prestixio de Agrasar Editores. O nome L∃EMOS foi coidadosamente elixido para representar esta dualidade de identidade e apertura. Cunha chiscadela á comarca de Lemos, e á palabra “leemos” en castelán e en galego (lemos), o novo selo convida ao público a descubrir e gozar de novas lecturas e voces.

Ademais, o logo de L∃EMOS incorpora o “símbolo existe” (∃), un elemento matemático que simboliza a apertura á multiplicidade de voces e a existencia de historias en diferentes xéneros e estilos, consolidando a L∃EMOS como un espazo onde cada obra atopa o seu lugar. No logo tamén se quixo representar a Monforte coa presenza dunha torre simbolizando a torre da homenaxe, un dos monumentos máis relevantes da cidade que acolle a editorial.

Co novo selo editorial, Agrasar Editores responde ao crecente interese de escritores de narrativa e poesía non ligados especificamente á temática monfortina, inaugurando unha nova etapa de apertura e expansión literaria.

O primeiro título baixo o selo L∃EMOS, “Máis fortes cas bolboretas”, chegará ás librarías nos próximos días, marcando o inicio dunha colección que promete sorprender e emocionar aos lectores con temas e perspectivas diversas máis aló das fronteiras de Monforte.