Nun encontro celebrado no Museo Provincial de Lugo trasladóuselle á xerente da Rede Museística Provincial de Lugo, a importancia deste galardón, que se concede a personalidades e institucións que destacan no ámbito cultural. Valorouse tamén “a oportunidade que o recoñecemento persoal supón desde o punto de vista colectivo, proxectando aos museos provinciais como un espazo de referencia en accesibilidade e inclusión en todo o Estado e como un lugar de encontro arredor da arte e do patrimonio”.
Iria Castro e Maite Ferreiro destacaron “as accións desenvolvidas para facilitar o acceso ao Museo, como a recente instalación dos códigos Navilens para guiar as visitas de persoas con baixa ou nula visión, e as programacións desenvolvidas en colaboración con colectivos sociais como unha contribución á inclusión e a interculturalidade”.
Durante o encontro, visitaron a exposición temporal “Museo da Migración da Rede Museística Provincial de Lugo: punto de partida”, ubicada no claustro e no refectorio do Museo Provincial de Lugo, con diferentes paneis que apelan á reflexión das persoas visitantes sobre os procesos migratorios e propoñen fomentar o diálogo intercultural. Tamén a mostra “As Xoias do Deserto”, unha selección de xoias tradicionais, fotografías evocadoras e vestimentas características das mulleres bereberes.
A Rede Museística Provincial de Lugo intégrana o Museo Pazo de Tor de Monforte de Lemos, o Museo do Mar de San Cibrao, a Fontaleza de San Paio de Narla en Friol e o Museo Provincial de Lugo.
