O Concello de Sober acordou no último pleno, a proposta da Alcaldía, dedicarlle a rúa do colexio, ata o de agora sen nome, á pintora, Maruja Mallo, polas súas raíces no municipio, en concreto co lugar de Naz, parroquia de San Martiño de Anllo. A proposta foi aprobada por unanimidade.
Polo que se sabe, o seu avó materno, José González, máis coñecido como Pepito, ferreiro de profesión, naceu e medrou na aldea de Naz, ata que emigrou a Vigo. Alí casou con Emilia Lorenzo e chegou a ser alcalde do desaparecido concello de Lavadores, que na actualidade está integrado no municipio vigués. Do matrimonio nacería María González Lorenzo, nai da pintora. Esta casou en Vigo co madrileño Justo José Gómez Mallo, unión da que naceu na cidade de Viveiro Ana María Manuela Isabel Gómez y González, nome completo de Maruja Mallo.
Ademais do acto do próximo día 6 de febreiro, o Concello de Sober colocará unha placa co nome de Maruja Mallo para sinalizar o nome da rúa e honrar así memoria desta artista de recoñecemento internacional. Previsiblemente inaugurarase no Mes do Amandi.
