A Biblioteca Municipal do Saviñao acolleu días atrás a presentación do primeiro poemario do autor Esteban A. Jiménez, Lágrimas de plata, publicado pola editorial Círculo Rojo.
Segundo conta a bibliotecaria, Mónica Carballo, “trátase dunha serie de poemas inspirados na experiencia persoal do autor, da que xa nos indica na cuberta como evoluciona a relación de parella: “Cuando el amor se convierte en tragedia”.
O autor contou parte da súa historia que inspirou os poemas deste libro, leu varios deles e tamén, en primicia, deu lectura a un dos poemas que incluirá no seguinte poemario da serie.
NOTA DA EDITORIAL
“Lágrimas de plata” convida ao lector a camiñar por un percorrido emocional profundo a través de versos que oscilan entre o amor, a tristura e a esperanza. O autor ofrece un relato sincero e crudo, plasmado nunha linguaxe poética que conecta coas emocións máis humanas.
A obra está dirixida especialmente a quen busca na poesía unha vía para reflexionar sobre a condición humana e as experiencias que nos transforman. Dispoñible en librarías e tamén en plataformas dixitais, “Lágrimas de plata” é un testemuño literario que amplía o compromiso do autor coa súa audiencia.
O AUTOR
Nacido en Badalona en 1965, apaixonado da literatura histórica e da poesía, decidiu publicar o seu primeiro libro de poemas dándolle un toque persoal, influído pola xeración do 98; con autores como José Martínez Ruiz (Azorín) ou Juan Ramón Jiménez, premio Nobel en 1956 e un dos seus inspiradores, descubriu ao escritor que leva dentro.
