A programación cultural e de lecer 2025 do Concello de Ribas de Sil abrangue desde o 19 de xullo ata o 20 de setembro e contará con propostas variadas que combinan tradición, entretemento e posta en valor da historia local.
Un dos eixos principais da programación está formado por actividades familiares organizadas en colaboración co programa Galescena da Axencia Galega das Industrias Culturais. Deste xeito, a Concellería de Cultura informa que haberá contacontos, monicreques, teatro infantil e circo con propostas como Home Orquestra, Duende Circo (25 de xullo), Cé Orquestra Pantasma (26 de xullo) ou O Grúfalo (2 de agosto).
Estas actividades desenvolveranse, como xa é tradicional, no anfiteatro da Praia Fluvial, o escenario ideal para as tardes de verán, ao aire libre, a carón do río e cunha configuración que se presta a gozar das propostas escénicas. Serán todos ás 20:00 horas.
A música tamén estará presente con propostas como o concerto do grupo Gin Toni’s o 24 de xullo ás 23:30 h na praia fluvial, así como actuacións de orquestras e música en directo para todas as idades.
As festas de verán, que se celebrarán do 14 ao 17 de agosto, contarán cunha programación especial que se anunciará proximamente nas redes do Concello.
CONVERSAS PARA POÑER EN VALOR A HISTORIA LOCAL
Como novidade deste ano, a Concellería de Cultura pon en marcha as “Conversas de verán”. Trátase duns encontros ao pé do Sil, na área exterior da Aula de Pesca da Praia Fluvial de San Clodio, e sempre ás 21:00 horas. Estas conversas, dirixidas polo mestre local Manuel Cao, están pensadas para xerar un espazo de participación cidadá, de lembranza e posta en común de historias locais. Terán unha duración aproximada de 45-50 minutos.
A axenda para esta actividade será a seguinte:
–A historia do ferrocarril en San Clodio (23 de xullo).
–A memoria da praia fluvial e acontecementos históricos (31 de xullo).
–A relación da familia Batanero co pobo de San Clodio (22 de agosto).
–O accidente do Salto (4 de setembro).
Completan a oferta cultural deste verán as visitas guiadas ao Centro de Interpretación da Minaría Aurífera Romana (sábados e domingos ás 12:00 e 14:00 h) e os campamentos de verán para nenos e nenas durante a semana, dos que se pode obter máis información no Concello.
