A festa contará este ano cun cartel cheo de calidade galega, encabezado polos Herdeiros da Crus. A banda de Ribeira estará acompañada dunha proposta musical do máis ecléctica: Quinkillada, Os Residuos Radiactivas, Rastreros e The Palagans.

Como é tradición na Mocidade Taboada, a festa finánciase coa axuda dos patrocinadores e a venda das camisetas: o custe inclúe -ademais da prenda- cervexa, calimocho e a cea: bolo preñado, empanada e tarta Ancano de chocolate. A festa, que celebrou a súa primeira edición no 2007, é unha xornada festiva de xuntanza entre amigos e amigas, coa música en galego como referente.

As camisetas pódense mercar a un prezo de 16€ no Café Bar Mario, Café Santa Lucía, Bar Devezo, ScalaTaboada, Bar Rian e en Distribucións Casa Guillermo. O prezo, antes do domingo, 3 de agosto, é de 16€, e desde o luns, serán 19€.

Na presentación oficial da Festa da Mocidade de Taboada contouse coa participación de Roi Rigueira, (alcalde de Taboada), Manuel Diéguez (concelleiro de Cultura de Taboada), Paloma Vázquez (Delegación da Xunta en Lugo), Pilar García (Deputación de Lugo) e Iria Castro (Vicepresidencia da Deputación).

Alexandre Varela, representando á asociación organizadora do evento, Madialeva O! Taboada, explicou na súa intervención que esta “é unha festa que busca manter os seus sinais de identidade”, como a tradicional camiseta e o roteiro polos bares. Varela tamén destacou “o gran cartel musical deste ano”, e agradeceu ás institución e entidades colaboradoras a súa axuda, “sen a que non sería posible organizar a Festa da Mocidade”. Os representantes institucionais destacaron o compromiso das súas áreas con iniciativas como a Festa da Mocidade, que enche de vida Taboada cada ano, dándolle pulo ao rural.