O activista cultural e medioambiental, escritor e regueifeiro, Séchu Sende, presenta o seu último libro, “Passa-montanhas”, editado por Chan da Pólvora. Aproveitará a súa presenza no Courel para dalo a coñecer nun acto aberto ao público na aldea de Ferramulín, no Concello de Quiroga.
O libro reúne máis de sesenta textos que orixinalmente son pezas audiovisuais realizadas para a rede social Tiktok, con máis de sesenta persoas diferentes. O fío de unión é o pasamontañas, prenda que se converte nun símbolo neste libro.
Segundo a editora Chan da Pólvora, dirixida polo monfortino Antón Lopo, este é un libro “con poemas que distintas persoas leron cos rostros tapados en curtas de vídeo coa intención de reivindicar as relacións sociais e humanas fronte ás redes virtuais. O libro busca representar unha sociedade insubmisa, loitadora, activa, militante e rebelde. Para o autor, o passamontanhas é un símbolo contrahexemónico e poñelo significa participar dunha revolución poética”.
O autor presenta o libro co lema “Poesía é revolución”, e no evento en Ferramulín reuniranse moitas das persoas que participaron no proxecto audiovisual e que aparecen no libro con cadanseu texto e fotografía con pasamontañas. De feito, o libro naceu en 2021 no contexto da loita cidadá contra a instalación de macroparques eólicos que impactarían no Courel.
PARTICIPACIÓN COLECTIVA E ORALIDADE
A obra, en palabras do autor, representa “unha experiencia colectiva onde a poesía ten unha finalidade: ser comunicativa e crear comunidade arredor de múltiples temas de interese social ou íntimo”. E engade, “é unha forma de vivir a poesía desde a oralidade, máis alá da escrita, nun momento histórico en que a dimensión oral é importante porque nos humaniza, reúnenos e crea comunidade. Máis alá das intelixencias artificiais e o mundo virtual, precisamos espazos para encontrarnos e a poesía sempre tivo esa función. Por iso este libro ten vontade de ser poesía popular ou poesía pop”.
Passa-montanhas impulsa claramente unha perspectiva sobre a oralidade. Segundo afirma Séchu Sende, “se o primeiro Rexurdimento no século XIX foi escrito, o segundo Rexurdimento, de chegarmos a activalo, debe ser oral e froito dun proceso real de participación colectiva”.
PRESENTACIÓN DO LIBRO
A presentación do libro será este domingo 17 de agosto ás 19:00 h. na “Casa da Manuela”, en Ferramulín. Participarán, ademais de Séchu Sende, poetas da zona como a brindadora Tegra de Tras o Couto, Vicente Reboleiro, e outras persoas vinculadas á Volta Grande do Courel, como as regueifeiras Estrela do Courel ou Maré a Muda.
O evento anúnciase como unha festa onde haberá “loias e regueifas”, poesía cantada improvisada.
