O certame deste 2025 contou con dúas categoría: Adultos e Infantil. Nesta última, pasouse de 4 relatos o ano pasado a 6 nesta edición, “un incremento modesto malia a ampla difusión realizada, xa que se agardaba unha maior participación do público infantil”, comenta Rocío de Peruchela Edicións. Pola súa banda, a categoría de Adultos reuniu 29 obras procedentes da comarca, doutras comarcas veciñas e tamén de comunidades como Madrid e Asturias.
En conxunto, a maioría dos relatos presentados foron escritos en castelán. Porén, curiosamente, na categoría de Adultos os tres premios recaeron en obras redactadas en galego, e na categoría Infantil tanto o primeiro como o segundo premio foron tamén para relatos en lingua galega.
O xurado, composto por Pilar Silvosa, Luis Castro e Manuel Fusaiola, todos eles vencellados ao mundo da cultura e das letras, salientou a calidade das obras gañadoras e sinalou que, aínda que os primeiros postos sobresairon claramente sobre o resto, houbo puntuacións moi axustadas entre os seguintes clasificados, o que fixo que a elección final requirise dunha deliberación coidadosa.
PREMIOS OUTORGADOS
Categoría de Adultos
1º Premio: Historias do muíño de Iria Rodríguez Rodríguez.
2º Premio: Cando florece a piorniña de Xesús Parada Jato.
3º Premio: O corazón de Maya de Rosa Noriega Rodríguez.
Categoría Infantil
1º Premio: A miña amiga cegoña de Suevia Villalda Iglesias.
2º Premio: A cidade dourada de Antón Nieves Rodríguez.
3º Premio: La luna llena de Eva Freire.
Todos os participantes recibirán, nas vindeiras semanas e de balde, un exemplar do libro oficial da edición, no que aparece incluído o seu propio relato. Para quen o desexe, tamén estarán dispoñibles exemplares adicionais á venda por 10 euros en calquera libraría do País.
Rocío, directora executiva de Peruchela Edicións e organizadora deste certame, comenta tras dar a coñecer os/as premiados/as, que “estou moi satisfeita coa diversidade das propostas recibidas. Para nós é fundamental promover a escrita a man, unha práctica que nos distingue e que queremos preservar a través deste certame. Agardo que nas vindeiras edicións a participación siga medrando e a calidade das obras sexa aínda maior”.
