O director xeral de Cultura, Anxo M. Lorenzo, asistiu o pasado 9 de outubro a un encontro coa poeta Olga Novo na Biblioteca de Galicia para encetar as actividades que programa a Consellería de Cultura, Lingua e Xuventude para celebrar o Día das Escritoras.

No marco deste encontro, Anxo M. Lorenzo salientou “a calidade extraordinaria das escritoras galegas, que están a construír unha literatura sólida, diversa e innovadora” e engadiu a importancia de “continuar reivindicando a presenza das mulleres na literatura galega e universal, reparando así as ausencias do pasado e abrindo camiños ás novas xeracións de creadoras”.

No obradoiro, a poeta Olga Novo empregou diversos obxectos como fíos condutores para explorar a relación entre ética e estética. A través destes símbolos, convidou ás persoas participantes a reflexionar sobre como a creación artística pode ser tamén unha forma de compromiso co mundo.

Ao longo da súa carreira, a autora recibiu numerosos recoñecementos como o Premio Nacional de Poesía pola obra Feliz Idade, o Premio da Crítica Española por Cráter ou o Premio Losada Diéguez por Nós nús.