Arredor dun cento de nenos en nenas dos centros de ensino de Monforte participarán na Cabalgata de Reis que percorrerá este luns, 5 de xaneiro, as rúas monfortinas ata chegar á Casa do Concello.

A Concelleira de Sanidade, Tráfico e Mobilidade, Pilar Espinosa, e o técnico da Concellería de Cultura, Carlos Rodríguez, foron os encargados de reunirse co alumnado participante e as súas familias para entregar a bolsa co material e informar sobre o desenvolvemento da Cabalgata. Nove escolares voluntarios foron escollidos por sorteo para acompañar aos Reis Magos nas súas respectivas carrozas, e o resto irán desfilando pola rúa e repartindo caramelos.

Os representantes municipais explicaron que este ano, debido ás obras que se executan na Estación de Renfe, as Súas Maxestades chegarán á pista cuberta da rúa Doutor López Suárez, fronte ao Cuartel da Garda Civil, onde se reunirán coa rapazada.

A chegada está prevista ás 17.30 horas, e os nenos e nenas que se acheguen poderán saudar os Reis Magos, que chegarán cargados de ilusión e bos desexos, pero tamén de caramelos que repartirán durante o desfile polas rúas da cidade.

No parque López Suárez conformarase a comitiva real, integrada por catro carrozas cos reis e os paxes. A Cabalgata comezará ás 18.30 horas dende Doutor López Suárez e avanzará cara Rosalía de Castro para facer o percorrido habitual polas rúas Calvo Sotelo, Roberto Baamonde, Cardeal, Avenida de Galicia (Ponte Nova) e Campo de San Antón ata chegar á Casa do Concello de Monforte, onde os Reis Magos serán recibidos polo Alcalde e demais autoridades e membros da corporación municipal nas escaleiras do edificio.

A continuación as Súas Maxestades lerán o discurso de dende os balcóns do Concello, finalizando a súa visita cunha recepción aos nenos e nenas na planta baixa do Consistorio.

O Alcalde anima a todos os veciños e veciñas a asistir á Cabalgata de Reis e agradece a colaboración dos centros de ensino CEIP Monforte, Escolapios, Fundación Educativa Torre de Lemos, Colexio Ferroviario e CEIP A Gándara.