Este pasado xoves houbo un interesante concerto da ‘brass band’ galega Brassica Rapa na Casa da Cultura de Monforte. A actuación, con entrada libre e de balde, estaba enmarcada no calendario de actos do 25 aniversario do Conservatorio Musical e fixo gozar ao público xeral así como ás autoridades municipais presentes.
O grupo combinou instrumentos de vento metal e percusión creando unha proposta sonora potente e festiva, cun repertorio fresco e variado no que non faltaron grandes éxitos do pop, o jazz, a música tradicional galega e as bandas sonoras.
A axenda de actos conmemorativos rematará o vindeiro 6 de xuño, ás 12.00 horas e tamén na Casa da Cultura Lois Pereiro. O que será acto central e de peche contará coas actuacións de exalumnos e exalumnas do centro que na actualidade se dedican profesionalmente á música. Concretamente, o barítono Lucas López López e a violinista Aldara Otero Fernández, que estarán acompañados ao piano polo profesor Azazel Fernández Prado. Tamén se realizará a entrega dun obsequio conmemorativo ao alumnado e a exalumnos e exalumnas presentes.
25 ANIVERSARIO DO CONSERVATORIO MUNICIPAL
O Conservatorio Municipal de Música ‘Mestre Ibáñez’ creouse en 1999 nunha aposta do Concello de Monforte pola formación musical de calidade, mantendo a día de hoxe unha ampla e variada oferta de estudos oficiais de música, en diversas especialidades. Na actualidade, conta con sete disciplinas musicais: Piano, Percusión, Clarinete, Saxofón, Violín, Vento metal e Guitarra; e cun equipo docente formado por 10 profesores e profesoras.
Neste primeiro cuarto de século, pasaron polo Conservatorio 800 alumnos e alumnas que, xunto co alumnado da Escola Municipal de Música na que se imparten ensinanzas non regradas, suman en conxunto máis de 2.000 alumnos e alumnas formados nas instalacións educativas emprazadas no Edificio Multiusos ao longo destes 25 anos.
