Xa está en marcha o ‘II Concurso de debuxo do Día da Muller 2019′ no que se anima a participar a todos os nenos e nenas do concello dos cursos de infantil, primaria e secundaria.
O tema do debuxo será “Mulleres no rural” e cada neno/a poderá entregar unha obra na que se permite traballar con liberdade no que respecta á técnica e ao uso de pinturas. O tamaño da ilustración será DIN-A4 sendo indiferente o enfoque en horizontal ou en vertical e o material do soporte pode ser papel ou cartolina.
En canto á valoración dos debuxos presentados teranse en conta a orixinalidade, laboriosidade, creatividade, o sentimento que transmita e, como non, a contextualización en relación ao lema proposto.
O prazo de entrega remata o 4 de marzo podendo presentarse as obras no rexistro do concello o una secretaría do Colexio de Currelos. Xunto co debuxo deberá acompañarse un anexo cos datos do autor ou autora. O fallo farase oficial o 7 de marzo comunicando o resultado aos gañadores. Os traballos quedarán expostos na Casa do Concello do 8 ao 31 de marzo.
O premio consistirá nun vale de 50€ na librería Loela e diploma acreditativo fixando 4 categorías das que sairá cada premiado: Infantil (4º, 5º e 6º curso), Primaria A (1º, 2º e 3º), Primaria B (4º, 5º e 6º) e Secundaria (1º, 2º, 3º e 4º ESO).
Así mesmo, tamén se convoca aos veciños e veciñas ao ‘Concurso de Fotografía Día da Muller 2019′ aberto á participación para maiores de 16 anos podendo presentar dúas fotografías por persoa.
O tema será o mesmo que no concurso de debuxo, “Mulleres no rural” , tendo que estar as obras necesariamente relacionadas. O prazo de entrega remata o 5 de marzo ás 14:00 h. remitíndose antes ao correo electrónico concelleriadecultura@concellodosavinao.net cun título, unha ficha de inscrición e unha autorización para publicar as imaxes.
As fotografías recibidas colgaranse na páxina oficial de do Concello do Saviñao nun álbum co título do concurso e optarán a dous premios: o premio do público da rede social Facebook e o premio do xurado. A foto con máis “gústame” ata o día 28 de marzo ás 14:00 h. resultará gañadora na categoría de público e aquela que resulte escollida por un grupo de persoas formado por persoal do concello e reunido o 29 de marzo será a gañadora do xurado. A mesma foto non poderá gañar nas dúas categorías.
No apartado de premios os dous gañadores, do público e do xurado, levarán unha fin de semana en Galicia con destino a escoller valorado en 300€ máis diploma acreditativo. As fotografías presentadas exporanse ao público na Casa do Concello do Saviñao tamén do 8 ao 31 de marzo.
