O alcalde e o Concello de Ribas de Sil vén de expresar a súa máis sincera felicitación á escritora Loli Rodríguez Rodríguez, nacida en Torbeo, pola concesión do II Premio Trevo de Narrativa en Galego 2026 pola súa novela Nailía.

O 19 de xullo, o xurado reuniuse en Santiago de Compostela para escoller a obra gañadora entre as cinco finalistas e o fallo fíxose público o 21 deste mesmo mes. Os membros do mesmo destacaron a riqueza da súa linguaxe, “a autenticidade da súa voz narrativa e a forza coa que recrea un universo literario profundamente enraizado e cheo de credibilidade”. Este novo recoñecemento chega despois de que Nailía obtivese tamén o Premio Torrente Ballester de Narrativa en Galego 2024, consolidándose como unha das novelas galegas máis destacadas dos últimos anos.

“Para o noso concello é un motivo de especial satisfacción que unha autora nacida en Torbeo continúe acadando importantes éxitos literarios e leve con orgullo o nome da nosa terra alí onde chega a súa obra”, recoñecía Roberto Castro, rexedor de Ribas de Sil, ao tempo que lle facía chegar á gañadora “os mellores desexos e parabéns polo merecido galardón”.