A Vicepresidencia da Deputación de Lugo fomenta a inclusión de teatro profesional dentro das axendas culturais de diferentes concellos da provincia. Neste comezo de outubro gozarán de representacións Bóveda, Sarria, Guitiriz e Portomarín.
Este venres, 2 de outubro, ás 15:30 horas o Centro Sociocultural de Bóveda acolleu o espectáculo Raio the Loubicán, unha obra da compañía Mircromina Títeres para público a partir de 3 anos.
A historia que Antolín O Bailarín lle contara ao Camiñante deixouno pensando na calidade das cadeas que venden nas feiras, ao saber que o can Linkecho fora quen de quebrar a súa, despois de 10 anos preso ao pé da palleira situada a 43ºLN.7ºLO. O fillo desa liberdade, froito da unión do can ceibo e da loba que baixou das montañas, é Raio The Loubican, metade lobo metade can, a estrela do espectáculo de varietés rural que xunto co Camiñante van de praza en praza amosando o seu talento.
TEATRO PARA PÚBLICO ADULTO EN SARRIA
O domingo 4 de outubro ás 20:00 horas a Casa da Cultura de Sarria recibe a compañía LÎLÂ Teatro para levar a escena a peza ‘Abra da Cabra’.
Trátase da viaxe iniciática dunha Cabra Montesa chegada ao mundo nun remoto e inhóspito lugar. Un día decide emprender unha longa viaxe na procura dunha vida máis próspera e amable, unha ousadía que tornará nunha odisea digna de calquera heroína mitolóxica.
Malia os malogrados intentos de convivencia pacífica coa raza humana, a protagonista non é quen de entenderse coa nova veciñanza de dúas patas. Despois de experimentar unha morea de extravagantes aventuras, algún alborozo e moitos pesares, plantéxase regresar de novo á ABRA, o abeiro da Cabra, á simple vida montesa para a que quizais foi concibida.
O ciclo continúa neste comezo de outubro nos concellos de Guitiriz e Portomarín. No primeiro deles será o Colexio de Santo Estevo de Parga o que acolla a obra ‘Gaela quere ser Druída’ (Trécola Producións) ás 10:30 h o xoves 8 de outubro; e no segundo, a obra ‘A Boneca de trapo’ (Loia Producións) interpretarase ás 11:00 horas no CEIP Virxe da luz o venres 9.
