O Presidente da Deputación de Lugo, José Tomé Roca e o Deputado de Promoción Económica e Social, Pablo Rivera Capón, deron a benvida aos participantes na Maratón Urbana de Special Olympics que se celebrou este domingo no concello de Sober.

A actividade forma parte do programa deportivo que, anualmente, leva a cabo a entidade galega para promover a práctica deportiva entre as persoas con capacidades diferentes e ao que a Deputación de Lugo achega 10.000€.

O mandatario provincial apuntou que “o deporte representa valores como o esforzo, a constancia, a vontade de superación, o compañeirismo e o respecto aos demais, e poucas organizacións traballan mellor arredor destes valores que Special Olympics. Un traballo co que concordan plenamente as políticas sociais que desenvolvemos dende a Deputación, para dar visibilidade e para mellorar a calidade de vida e a integración a todos os niveis das persoas con discapacidade”.

“A familia de Special Olympics pon todos os medios para que a sociedade avance máis rápido, con máis forza e máis lonxe polo camiño da inclusión, do respecto e da igualdade. Uns obxectivos que nos fan a todos e todas mellores e máis fortes como sociedade”, subliñou o Presidente.