Este sábado, 24 de agosto, a parroquia Santa Cruz de Brosmos, en Sober, reunirá a 200 ciclistas de BTT para participar neste percorrido de preto de 50 quilómetros. Trátase dunha proba non competitiva que permite aos participantes coñecer a beleza da paisaxe desta parroquia da Ribeira Sacra, ao tempo que se goza do deporte e a natureza.

O percorrido ten un trazado de 29 quilómetros de sendeiros, máis de 14 quilómetros de pista e preto de 6 quilómetros de estrada, ademais os ciclistas contarán con tres puntos de avituallamento e zona de duchas, aparcamentos ou limpeza de bicicletas.

A cita está organizada por Biciracing Monforte, e conta coa colaboración do Concello de Sober e da Vicepresidencia da Deputación de Lugo, a través da área de Deportes, que “destaca a importancia de apoiar estas probas que demostran o compromiso e a clara aposta polo deporte, polo turismo e polo territorio que se mantén ao longo do ano con diferentes iniciativas”.