O Presidente da Deputación de Lugo, José Tomé Roca, anunciou o venres 13 de decembro que a institución provincial achegará 15.000 € ao piloto de motos Eduardo Iglesias para que poida participar no Rally Dakar 2025. Fíxoo na Praza de San Marcos, onde recibiu ao monfortino, único motorista galego presente na competición, valorando a súa participación nunha das probas máis duras e máis mediáticas do mundo. “Apoiamos o talento e o esforzo dos deportistas da provincia polos valores que transmite o deporte e pola súa capacidade para promocionar o noso territorio”, sinalou.

Esta será a quinta ocasión na que Eduardo Iglesias participa no Rally Dakar, que volverá a ser en Arabia Saudita entre o 3 e o 17 de xaneiro. Como todos os anos, e para visibilizar o patrocinio da institución provincial, o piloto portará o escudo da Deputación na moto, na vestimenta, na furgoneta e nunha carpa.