A carreira Sarria 10 km celebrarase o vindeiro 9 de febreiro e este luns, 23 de decembro, ábrese o período de inscricións para participar. Desde a organización aseguran que queren dar un salto de calidade nos servizos ofertados para mellorar a experiencia dos deportistas, “cun percorrido practicamente chairo, urbano, con boa temperatura e sen apenas dificultades, que ofrece todo o que un atleta popular require na procura da tan ansiada mellor marca persoal”.
A proba ofrece varias modalidades de participación: 10km e 5km (16 anos en diante), 2500m para as categorías SUB16, SUB14, e 1500m para as categorías SUB12 e SUB10. Ademais, celebraranse dúas actividades non competitivas, unha andaina de 5km para todas as idades e unha carreira de pitufos de 200m para os máis pequenos.
A proba que busca situar Sarria no calendario de grandes probas populares en Galicia conta co patrocinio da Vicepresidencia da Deputación. Efrén Castro explicou que “co apoio a esta proba ampliamos o mapa do deporte popular na provincia, un aliciente para a práctica de actividade física en persoas de todas as idades e tamén unha oportunidade para a dinamización económica”.
