O Concello de Sarria segue a innovar no que se refire a actividades, e neste caso faino ofrecendo a posibilidade de aprender unha disciplina deportiva coa que non se contaba nas Escolas Deportivas, o snooker. Este sábado 25 de xaneiro, ás 16:00 h, será a presentación na Feculera, no Club de Billar Snooker Sarria.

Estamos a falar dunha actividade pioneira no noso país e, segundo refiren fontes do concello, “Sarria convértese no primeiro en ofrecer aos seus veciños e veciñas a oportunidade de aprender e practicar o snooker, unha das modalidades de billar máis vistas en Eurosport e considerada unha das máis esixentes”.

A presentación contará ademais cunha masterclass de balde impartida polo billarista sarrián Juan Pedro Durán “Gussy”. Será unha oportunidade única para coñecer este deporte en detalle: aspectos técnicos, regras, competicións e diferenzas co resto de modalidades.

A xornada, ademais de servir de presentación e de goce de ver xogar a “Gussy”, permitirá aos asistentes a probar esta disciplina.

Aquí podedes ler unha entrevista que lle fixo Xornal de Lemos a Juan Pedro Durán “Gussy” no 2021.