A Tenente de Alcalde, Gloria Prada, acompañada polo Director Deportivo da Federación Galega de Voleibol, Juan Carlos Suárez, o presidente do Club Korbis, Roberto Castro, o adestrador da sección masculina do Korbis, Miguel Ángel de la Gama, e o Concelleiro de Deportes, José Manuel Mougán, presentou a segunda proba do Campionato Galego de Voleibol Benxamín e Prebenxamín que se disputará no Pavillón polideportivo municipal da Pinguela este sábado, 15 de marzo.

A Tenente de Alcalde destacou que “para o Concello de Monforte sempre é un pracer albergar eventos deportivos de categorías de base, pois como ben expresa o cartel que temos aquí deste Campionato, eles son as futuras estrelas, neste caso do volei galego, e por iso debemos apoialas”. O Concello de Monforte destina este ano máis de 150.000 euros en axudas ós clubes e entidades deportivas.

O director deportivo da Federación Galega de Voleibol resaltou o éxito en canto a participantes: prevese a presencia na cidade de máis de 150 nenos e nenas, e 30 equipos de categorías inferiores, que virán acompañados de adestradores, persoal técnico, árbitros, familiares e amigos, coa repercusión socioeconómica que isto supón.

Virán xogadores e xogadoras provintes de todos os puntos de Galicia, de concellos coma Rianxo, Lugo, Pontevedra, Ourense, de A Coruña ou Narón, entre moitos outros. Da provincia de Lugo ademais do Korbis participarán o EMEVÉ e o C.V. Ribeira Sacra.

O presidente do Korbis explicou que para o desenvolvemento deste campionato, instalaranse no Pavillón da Pinguela 6 pistas simultáneas. Os deportistas do Club Korbis colaborarán en labores de voluntariado e axudando á arbitraxe dos diferentes encontros.