A cuarta edición da carreira Xacorun desenvolverase este domingo, 30 de marzo, cun percorrido polo Camiño de Santiago entre Sarria, Paradela e Portomarín.
A organización agarda a participación duns 250 deportistas. Como en ocasións anteriores, ofrece tres modalidades de participación, nas que se poderán completar 23 quilómetros dende Sarria ata Portomarín individualmente ou por remudas -con cambio en Mirallos – ou 10 quilómetros de forma individual – con saída dende Mirallos -.
Os promotores incidiron en que se trata dun evento que fomenta a práctica deportiva e ao mesmo tempo contribúe á promoción da zona, xa que congrega a moitos corredores e acompañantes que en moitos casos aproveitan para realizar visitas turísticas. Colabora coa organización a Xunta de Galicia e a Vicepresidencia da Deputación de Lugo.
