O domingo 24 de marzo terá lugar a décimo primeira edición deste evento deportivo, un clásico xa dos que congregan maior participación popular en Monforte de Lemos. Ese día darase saída a 5 carreiras en función das categorías, de xeito que haberá unha proba absoluta de 10.000 metros e catro probas menores de 80, dúas de 700, 1.300 e 2.000 metros. Todas elas terán saída e meta na Explanada da Compañía.
O percorrido queda do seguinte xeito: Saída da Praza Compañía – Paseo de Lugo – Carude – San Lázaro – Reboredo – Dalmiro de La Válgoma – Escultor Francisco Moure – Rúa Sarria – Avenida de Galicia – Rúa Hortas – Rúa Doctor Casares – Paseo do Malecón – Ponte Vella – Rúa Antonio Méndez Casal – Praza Campo de San Antón – Rúa Ourense – Avenida de Galicia – Rúa Cardeal – Escultor Francisco Moure – Praza da Compañía
Todas as carreiras, incluídas as carreiras de categorías menores, contarán cun sistema de cronometraxe con chip, a excepción da carreira de categoría mini, na que participan os máis pequenos e que non é competitiva.
Respecto aos premios que recibirán os atletas, haberá un trofeo conmemorativo do evento para os tres primeiros clasificados de cada unha das categorías, agás na categoría mini, na que todos os participantes que crucen a liña de meta recibirán unha medalla e unha bolsa de lambetadas.
Premios clasificación xeral: os tres primeiros clasificados da carreira absoluta, tanto en categoría masculina como feminina, recibirán trofeo e premio económico segundo a clasificación alcanzada. O primeiro/primeira recibirá un premio de 300 euros, o segundo/segunda clasificado/a 200 e o terceiro/terceira 100.
Nesta proba absoluta haberá tamén un premio especial consistente en trofeo e agasallo para os/as 3 primeiros/as clasificados/as locais, que estean empadroados en Monforte.
Outros premios que se concederán son: un premio por equipos con trofeo para os tres mellores equipos clasificados. Estes equipos deberán ser obrigatoriamente mixtos (50% homes e 50% mulleres) estar compostos por un mínimo de 4 compoñentes e un máximo de 6 compoñentes. E tamén un galardón para o centro educativo con maior número de participantes que crucen a liña de meta nas distintas categorías.
Todos os participantes recibirán avituallamento sólido e líquido ao rematar a carreira e un agasallo conmemorativo do evento.
A inscrición pode facerse na páxina www.championchipnorte.com, tanto para a carreira absoluta como para as carreiras de categorías menores.
