O Club Quixós instaurou dende hai uns anos a tradición de comezar o ano remando nun percorrido que transcorre polo río Cabe dende Ribas Altas ata o Parque dos Condes onde está o embarcadeiro e teñen o local.
Este ano foron dez piragüistas os que apartaron a un lado a preguiza e desafiaron ao frío e á resaca de sono para meterse nas xélidas augas do Cabe. A cita era ás 10:30 h. no propio local para cargar as piraguas e achegarse ao comezo do percorrido na Azud de Ribas Altas. Dende este punto, e marcando o termómetro 2 graos, iniciaron a baixada duns catro quilómetros e con varios puntos nos que o atractivo son pequenos saltos de auga que lles fai subir a adrenalina aos participantes.
O presidente do Club, Iván Gutiérrez, foi este ano o guía do grupo no que estiveron Noa, Sara, Nerea, Gabriel, Diego, Lucas, Xoel, Manuel e Breixo. O director técnico, Santiago Díaz, non puido estar nesta ocasión.
A chegada ao Parque dos Condes tivo lugar ás 12:30 h. Alí desembarcaron, cambiáronse e degustaron un merecido chocolate quente con galletas e biscoito.
