O domingo a saída será ás 10:30h desde a Praza do Concello para facer os circuítos do alto de Guítara. Esta cita co Enduro está organizada pola Liga de Moto de Campo coa colaboración do Concello de Pantón e doutras entidades. Ademais das especiais de Guítara contarase con probas na contorna do colexio Monte Baliño, “trátase de probas pensadas para que a xente as teña fácil para seguir, así en colaboración coa organización mantéñense estas probas para achegar o espectáculo á propia capitalidade municipal”, explica o alcalde de Pantón, José Luis Álvarez.

Ata o momento cóntase con 120 pilotos inscritos, desde a organización destacan o éxito de inscricións e o nivel dos participantes, “Pasar do cento de inscritos sempre é un éxito, de momento estamos en 120 e seguirán aumentando. Destaca tamén o nivel dos pilotos cunha ducia de pilotos da categoría Elite dos que a metade acaban de participar do Nacional estando entre os 20 mellores o que será un auténtico luxo”, asegura Javier Quintas, responsable deportivo da Liga da Moto.

“Este domingo o motociclismo regresa a Pantón para que a afección poida desfrutar do enduro, e tamén da gastronomía, o patrimonio e a cultura do noso municipio. Desde o concello faise unha aposta clara pola dinamización do deporte e do noso territorio”, conclúe o rexedor local que convida á participación nesta cita.