A XVI Carreira Popular do Concello de Monforte, que se celebrará o domingo 26 de abril, conta xa con 1.081 persoas incluídas nos listados de participación. O rexedor, José Tomé, anima aos monfortinos e monfortinas, e aos afeccionados a este deporte en xeral, a inscribirse nun evento “que encherá de corredores e corredoras as rúas máis céntricas da cidade”, afirma. Esta carreira, engade, “xa é unha tradición na nosa cidade e tamén unha referencia no calendario dos corredores e corredoras doutras localidades”. A inscrición é totalmente gratuíta, a través da páxina web www.monforte10k.com.
O evento, organizado polo Concello de Monforte a través da Concellería de Deportes, contará co seu tradicional percorrido de 10 km para a carreira absoluta, así como percorridos para as carreiras de categorías menores, en función da idade das persoas participantes. Ata o momento son 1.081 inscritos, que por categorías distribúense do seguinte xeito:
- Mini (2022 e posteriores): 87
- Prebenxamín (2019-2021): 217
- Benxamín (2017-2018): 162
- Alevín (2015-2016): 127
- Cadete (2011-2012): 99
- Absoluta (2010 e anteriores) 389
Diferentes percorridos e categorías
A carreira absoluta, de 10.000 metros, discorrerá por un percorrido completamente urbano que transcorrerá polas rúas máis céntricas da cidade. Así mesmo, establécense catro probas dirixidas a menores, de 80, 700, 1.300 e 2.000 metros. Todas elas terán saída e meta na Explanada da Compañía, a carón dos Escolapios.
O percorrido da carreira absoluta será o seguinte: Saída da Praza da Compañía – Paseo de Lugo – Carude – San Lázaro – Reboredo – Dalmiro de La Válgoma – Escultor Francisco Moure – Rúa Sarria – Avenida de Galicia – Rúa Hortas – Rúa Dr. Casares – Paseo do Malecón – Ponte Vella – Rúa Antonio Méndez Casal – Praza Campo de San Antón – Rúa Ourense – Avenida de Galicia – Rúa Cardeal – Escultor Francisco Moure – Praza da Compañía.
Trátase dun percorrido de 5 km no que os corredores e corredoras terán que dar dúas voltas. Todas as carreiras, incluídas as de categorías menores, contarán cun sistema de cronometraxe con chip, a excepción da carreira de categoría mini, que non é competitiva.
Premios por categorías: trofeo conmemorativo do evento ós/ás tres primeiros/as clasificados/as de cada unha das categorías excepto na categoría mini na que todos/as os/as participantes que crucen a liña de meta recibirán unha medalla e unha bolsa de lambetadas.
- Premios clasificación xeral: os/as tres primeiros/as clasificados/as da carreira absoluta recibirán trofeo.
- Premios económicos: os/as tres primeiros/as clasificados/as da carreira absoluta recibirán premio económico segundo as seguintes cantidades:
- 1º clasificado: 300 €
- 1ª clasificada: 300 €
- 2º clasificado: 200 €
- 2ª clasificada: 200 €
- 3º clasificado: 100 €
- 3ª clasificada: 100 €
- Premios especiais da carreira absoluta: haberá premio especial de trofeo e agasallo para os/as 3 primeiros/as clasificados/as locais (empadroados/as en Monforte).
- Premios por equipos: recibirán trofeo os tres mellores equipos clasificados na carreira absoluta. Estes equipos deberán ser obrigatoriamente mixtos (50% homes e 50% mulleres) e estarán compostos por un mínimo de 4 compoñentes (dous homes e dúas mulleres) e un máximo de 6 compoñentes (tres homes e tres mulleres).
Todos/as os/as participantes recibirán avituallamento sólido e líquido ao finalizar a carreira, así como un agasallo conmemorativo do evento.
A entrega de dorsais individuais realizarase por adiantado nos seguintes puntos de recollida: Oficina Municipal de Deportes (Casiñas da Compañía): Venres 24 de abril: de 9:00 a 14:00 e de 16:00 a 20:00 h. Sábado 25 de abril: de 9:00 a 14:00 h. Puntos de recollida fóra de Monforte: haberá puntos de recollida fora de Monforte e espallados polas catro provincias para facilitar a recollida do dorsal a todas as persoas participantes que non vivan en Monforte. Envío do dorsal a domicilio: Será necesario indicar o punto de recollida do dorsal durante o procedemento de inscrición.
