O club de piragüismo Quixós volveu poñer Monforte e a provincia de Lugo no mapa deportivo nacional cos resultados acadados esta fin de semana, días 20 e 21 de xuño, nunha competición que tivo como escenario o río Ésera da localidade de Graus (Huesca). Tratábase do XXIII Campeonato de España de Aguas Bravas na modalidade de descenso, competición á que o equipo liderado por Santi Díaz chegaba cunha expedición algo xusta de efectivos pero moi alta de moral.

Por equipos, o Club Quixós quedou no segundo posto na Liga Nacional e de primeiro no Campeonato de España de Jóvenes Promesas.

No que respecta ao medalleiro individual, salientar os ouros de Sara Inés Varela, en K1 clásica; Ximena & Sara Inés en C2 clásica; e Xoel Fernández Méndez, quen acadou dúas medallas de ouro, en K1 e C1 sprint.

No apartado de medallas de prata, o club tamén volve servido de Graus. Sara Inés acadou dúas, en C1 e K1 sprint respectivamente; Diego Expósito outro par delas, en C1 sprint e C1 clásica; sumándose aos anteriores Lucas Pavón, cunha en C1 sprint.

E para pechar o medalleiro, aquí os bronces acadados. Martín Prats volvía a Monforte con 3 metais, en K1 e C1 clásica e C1 sprint; Lucas Pavón, en K1 sprint; Ximena Prats, en C1 sprint; e Rodrigo Morillo, en C1 sprint.

Uns resultados, en definitiva, que enchen de orgullo ao director técnico do club, Santiago Díaz, quen pensa xa na vindeira competición que os levará a vindeira fin de semana a terras catalás, concretamente á localidade de Sort.