A posta en marcha desta empresa supuxo un investimento de 1,6 millóns de euros, dos que 478.000 son achega da Xunta, ao abeiro da orde de axudas que a Consellería do Medio Rural habilita para investimentos en transformación e comercialización de produtos agrarios, cofinanciadas polo Fondo Europeo Agrícola de Desenvolvemento Rural, a través do PDR 2014-2020. Aspiran a xerar 25 postos de traballo directos

A empresa que comezou a súa actividade hai dous meses e medio, conta cun cadro de persoal de 7 persoas e aspira a estar a pleno rendemento nun ano. Este venres, 6 de setembro, contou coa visita do delegado territorial da Xunta en Lugo, José Manuel Balseiro.

Balseiro explicou que o proxecto encaixa á perfección cun dos obxectivos estratéxicos marcados polo Goberno galego para garantir un futuro máis sólido para o sector cárnico: a aposta pola orixe galega. “Esta empresa traballa con reses autóctonas selectas procedentes de pequenas explotacións gandeiras e dunha selección de matadoiros, todo isto, para marcar a diferencia pola calidade e a trazabilidade do produto”-dixo Balseiro.

Gallaecia Delicatesen naceu co obxectivo de cubrir unha demanda de produtos cárnicos e preparados a nivel nacional e internacional e, de feito, xa exporta a países como Bélxica ou Francia.

Outra das iniciativas innovadoras promovidas por esta empresa é a posta en marcha dunha aula de formación e show room para promocionar os produtos, formar ao persoal e destinada tamén a catas e demostracións in situ.