Dende a Concellería do Camiño de Santiago e Cultura do Concello de Sarria traballan xa na organización da XIII Edición do Concurso de Tapas Tapicheo 2019, evento que terá lugar, como de costume, a principios de decembro.

De cara a ir deseñando os diferentes roteiros e saber con que establecementos se pode contar para esta ocasión a devandita concellería convoca a tódolos hostaleiros do municipio interesados en participar no evento, a unha reunión que terá lugar o vindeiro venres día 27 de setembro ás 17:00h, no salón de plenos do Concello de Sarria.

No ‘Tapicheo 2018’ participaron un total de 24 locais que se encaixaron en cinco rutas,  cada unha delas representada por unha cor, e que presentaron interesantes e saborosas creacións gastronómicas.

Esta actividade gastronómica, que se vén desenvolvendo dende hai doce anos, contribúe a dinamizar a hostalería local e o turismo en Sarria, motivo polo cal o actual goberno desta vila pretende reforzar a súa organización e promoción.