Este Concurso de Proxectos Empresariais é unha iniciativa de Semente Monforte, asociación creada a raíz do premio da Lotaría do Neno, que caía na cidade do Cabe no 2014. O obxectivo era reverter esa sorte na cidadanía, promovendo a solidariedade e “sementando” iniciativas empresariais que impulsasen o desenvolvemento económico de Monforte e a súa contorna.

A Asociación foise abrindo á participación de empresas, Administracións e á Universidade para, entre todos, dar máis impulso ás iniciativas que puideran xurdir. Agora, como Semente Ribeira Sacra, presentábase esta VI edición do Concurso. Sara Fernández, a presidenta deste colectivo destacaba no acto de presentación, “é importante que quen teña unha idea teña axudas e por iso agradecemos as novas incorporacións de empresas e administracións, que fan posible que esteamos falando xa da sexta edición deste concurso”.

Un concurso que premia a inciativa empresarial, con 20.000 euros. Un primeiro premio de 10.000 euros, segundo de 7.000 e terceiro de 3.000. A presentación de ideas, aberta a ideas de calquera parte do mundo, comeza o 1 de xaneiro do 2020, a través da web sementemonforte.org e remata o 16 de febreiro. A entrega de premios será o 9 de maio.

O obxectivo da Asociación é que os emprendedores poidan desenvolver as súas iniciativas. Acompañaban a Sara Fernández; o alcalde de Sober, Luis Guitián como Presidente do Consorcio de Turismo da Ribeira Sacra; en representación da Deputación de Ourense, Rosendo Luis Fernández e, o administrador da empresa SICYME, Mariano Méndez, en representación dos patrocinadores do eido empresarial.

O Conselleiro de Industria, Francisco Conde, agradeceu a Semente Ribeira Sacra a invitación e o impulso para depois de 6 anos seguir traballando, e “colaborando coas diferentes Administracións e o tecido produtivo para xerar unha nova cultura de emprendemento na Ribeira Sacra e polo tanto impulsar esas iniciativas empresariais dinamizando a economía desta zona.”

A diversidade de sectores representados na presentación do concurso era visto polo Conselleiro como unha resposta desde a Ribeira Sacra para dinamizar o territorio desde as súas potencialidades, “A vocación da Asociación por apostar polo talento identificando eses proxectos, que é o que motiva o desenvolvemento e segundo elemento, a identidade territorial que a Asociación lle quere dar a este proxecto aglutinando todos os actores da Ribeira Sacra, que conxuntamente queremos afrontar os retos”.

Nun entorno económico de dixitalización e búsqueda da sustentabilidade, Francisco Conde engadiu a colaboración como ingrediente fundamental, “A capacidade que poidamos ter para colaborar as diferentes administracións, podendo ofrecer facilidades a través dunha xanela única para axilizar os procedementos e dar soporte ás diferentes iniciativas, e a partir de aí, o que necesitamos son ideas”.

“O que precisamos con máis intensidade son ideas”

Francisco Conde afondaba, coa súa intervención, no tipo de proxectos e ideas que serían interesantes para este Concurso, ao sinalar que demanda a situación económica actual. “Dar novas solucións neste contexto de cambio dixital, nese contexto de loita contra o cambio climático. E nese contexto dar as solucións innovadoras que precisa o noso tecido produtivo. E que a partir de aí un territorio sexa capaz de atraer novos inventimentos. Ese é o principal obxectivo que nos une aquí esta tarde. Neste contexto, a identidade territorial da Ribeira Sacra ten un elemento diferenciador que temos que converter, entre todos, nunha oportunidade; ser candidatura a Patrimonio da Humanidade, ter presentado solicitude para Reserva da Biosfera e o propio Camiño de Inverno.”

Segundo o Conselleiro, estas circunstancias, sumadas ás características vitivinícolas,  paisaxísticas e arquitectónicas permiten que a Ribeira Sacra poida ver o futuro desde unha perpectiva totalmente distinta e “nesas oportunidades temos que traballar por impulsar novos proxectos e dinamizar esas ideas para poder darlles unha resposta”.