Antes da sesión plenaria, o Presidente da Deputación, José Tomé Roca, destacou a importancia de que esta dotación pública estea ao servizo dos cidadáns de Sarria e da comarca, pediu o compromiso da Xunta de Galicia, e urxiuna a que “se molle”.
Explicou o Deputado de Promoción Económica e Social, Pablo Rivera Capón, durante o Pleno que as máis de 950 granxas da comarca -das que 232 están no municipio de Sarria- están tendo que levar o gando a matadoiros doutros concellos, “o que significa máis custos e menos competitividade por culpa da mala xestión municipal”. Nese sentido, Rivera Capón relatou como tras unha avaría ocorrida a finais de agosto na caldeira de auga quente e vapor, e tras meses pechado, o Alcalde sarriao sinalou débedas da dotación municipal de entre 150.000 e 200.000 euros.
Unha situación que segundo denunciou o Deputado está a motivar a perda de moito volume de negocio e repercutindo no consumidor final polos custos que supón o transporte ao adquirir gando doutras comarcas. Recordou ademais que hai apenas dúas semanas unhas 400 persoas se concentraron en Sarria ante esta situación.
O texto da proposta de Goberno recolle, por unha banda, instar ao Concello de Sarria a ser dilixente e áxil á hora de resolver a situación ante o “malestar” do sector, e de presentar o antes posible un proxecto económico sólido e viable á Xunta de Galicia para recuperar con celeridade a actividade do matadoiro de maneira definitiva e non con carácter transitorio. Por outra, esixirlle á Consellería do Medio Rural da Xunta a cumprir co seu compromiso de subvencionar gran parte do investimento necesario para poñer en marcha o matadoiro de Sarria.
