Os nacionalistas organizan actos informativos sobre a tramitación das axudas publicadas a semana pasada no DOG para a conservación do entorno paisaxístico e loita contra a erosión nos viñedos da Ribeira Sacra. Este xoves, 9 de xaneiro, achegaranse ás 18:00h a San Clodio e ás 20:00h estarán en Quiroga.

“Nas aldeas estamos moi afeitas á autosuficiencia porque padecemos a desidia das administracións no vivir cotiá, e iso fíxonos máis fortes, pero somos hoxe máis dependentes que hai corenta anos, e xa vedes que poucas quedamos” lamenta Rosana Prieto, responsable comarcal do BNG, que cre que na Ribeira Sacra hai futuro da man dos sectores produtivos, “pero con políticas adaptadas á nosa idiosincrasia, podemos producir moi bos viños, pero non podemos facer chairas nas ribeiras, nin queremos”.

Prieto insiste en que “a situación que se deu no 2024 pode ser a véspera do abandono masivo do cultivo das Ribeiras, o que significaría sepultar tamén, a candidatura a Patrimonio da Humanidade, e as oportunidades que esta puidese abrir”.