A Xunta de Goberno da Deputación de Lugo aprobou este venres un novo investimento para mellorar a mobilidade da provincia por un importe de 2,23M€ en diferentes actuacións que afectan a estradas de todo o territorio. Así na Pobra do Brollón quedaron licitadas as obras para rehabilitar preto de máis de oito quilómetros na LU-P-4702, que é a estrada que conecta os lugares Vilachá e A Estación por Rozavales.
Os traballos, cun prezo de 466.626,44€, afectan ao treito comprendido entre o quilómetro 2,575 e o 10,897 e consisten en tarefas para mellorar a drenaxe, a pavimentación con aglomerado en quente e sinalización. O prazo de execución será de tres meses desde que comecen as obras. A Deputada García Porto destacou a importancia dos traballos que “mellorarán as comunicacións da veciñanza de Vilachá de Salvadur, A Eirexa e Salgueiros”.
Tamén a Xunta de Goberno deu luz verde a un convenio de colaboración co Concello de Taboada para rehabilitar o edificio da antiga Cámara Agraria, un inmoble construído no 1950 para o que “urxe a súa remodelación”. Grazas a este acordo “Taboada non só recuperará un edificio histórico, senón que tamén contará con un espazo útil no que poder organizar numerosas actividades para fomentar a convivencia ente os veciños e veciñas”, destacou a Deputada, quen detallou que os traballos previstos consistirán na demolición dos tabiques interiores; a incorporación de 2 aseos na planta baixa, un deles adaptado para persoas con mobilidade reducida e un terceiro na planta alta; a dotación de ambas plantas das correspondentes instalacións de auga, luz e rede de sumidoiros e tamén se substituirá a carpintería actual; e no exterior, instalarase unha nova cuberta conservando a estrutura existente.
