A Deputación en colaboración co Goberno Central sacan adiante este proxecto dotado de 200.000 euros cos que os Concellos poderán solicitar axudas para formar a rapaces de 16 a 30 anos de idade, e insertalos laboralmente.

No Real Decreto 1234/2018 aprobado polo Executivo de Pedro Sánchez ofrécense novas solucións para o rural, a través de subvencións directas ás propias entidades locais que son as que mellor coñecen as necesidades do seu territorio.

O plan contempla varias liñas de actuación:

– Formación a mozos de entre 16 e 30 anos, que deberán estar inscritos no Sistema de Garantía Xuvenil. Os mozos seleccionados para formar parte deste programa recibirán formación gratuíta en distintos sectores punteiros na provincia e recibirán unha beca durante o tempo de aprendizaxe. Deste xeito, únese a demanda existente no tecido empresarial da provincia coa oferta, cubrindo o posto de traballo cun perfil formado na materia que necesitan. As empresas que participen nesta programación tamén recibirán axudas.

– Fomento do emprendemento. Entre os rapaces participantes neste proxecto, impulsarase o autoemprego e o emprendemento, ofrecendo axudas a mozos que teñen unha idea clara de negocio e queiran poñela en marcha.