O último informe deste órgano fiscalizador refírese aos exercicios 2021, 2022 e 2023 e sitúa ao Concello de Monforte no nivel ALTO de madurez do seu sistema de control interno, a máxima categoría establecida nesta avaliación. O rexedor destaca que se trata dun resultado especialmente relevante tendo en conta que só 26 dos 259 concellos avaliados acadaron este nivel. “Estamos ante un dato moi importante porque non é o Concello quen se cualifica a si mesmo, senón que falamos do Consello de Contas de Galicia. Estamos falando dun órgano fiscalizador cuxa composición responde á representación dos diferentes grupos parlamentarios (1 PSOE, 1 BNG, 3 PP). É unha avaliación independente e baseada nunha metodoloxía común para o conxunto das entidades locais”, explica Tomé.
O informe, publicado polo Consello de Contas o 31 de xullo, avalía o funcionamento dos sistemas de control interno das entidades locais galegas durante o período 2021-2023. A máxima categoría foi acadada por unha porcentaxe reducida dos Concellos avaliados: 26 de 259, o que sitúa a Monforte dentro do grupo de entidades locais con mellores resultados nesta materia, “no grupo dos líderes en boa xestión e en transparencia”, apunta o rexedor.
Para o alcalde, este resultado debe poñerse en relación coa xestión económica do Concello nos últimos anos. “Este dato fala por si só do traballo realizado polo Equipo de Goberno desde que cheguei á Alcaldía en 2015. Todos os anos pechamos as contas con remanentes positivos e levamos 11 anos sen subir os impostos municipais. Pero, por riba de todo, este informe acredita que detrás da actividade diaria do Concello existe un sistema de control interno que funciona e que acadou un nivel de madurez que o propio órgano fiscalizador considera ALTO”, afirma Tomé, que considera que estes datos supoñen motivo de satisfacción, “pero tamén de responsabilidade, para continuar con este tipo de xestión de cara ó futuro”.
“Aqueles que nos acusan de escurantismo e falta de transparencia cando aprobamos os orzamentos deberían coñecer mellor como funciona un orzamento municipal e, sobre todo, deberían preguntarlle ao Consello de Contas de Galicia. Porque son os seus informes, e non as opinións políticas, os que acreditan como funciona o sistema de control interno do Concello”, conclúe.
