InicioMedio ambiente e PatrimonioMolinos de Antero, ser casa de recadación fixo inventar sistemas de seguridade

Molinos de Antero, ser casa de recadación fixo inventar sistemas de seguridade

Entre finais do século XVIII e comezos do XIX, Manuel Antero Yáñez Rivadeneira, funda o Pazo Molinos de Antero. A súa función fundamental era a de centro de recadación das rendas do tabaco e outros impostos para a corte. A casa pensouse para esta tarefa e conta cun enxeñoso sistema de seguridade e vixilancia a base de miras repartidas por paredes e portas.

Publicado o

- Advertisement -

Molinos de Antero amosa a súa arquitectura afrancesada á beira da estrada do Malvarón, en Monforte. Xa no interior destaca a decoración pictórica italianizante de Castinande, que viste toda a capela, e polo seu inmenso arquivo. Os herdeiros do fundador seguen hoxe vivindo en torno ao pazo para non deixalo morrer, e con el toda a riqueza que atesoura.

Ás instalacións, que mostra ao visitante a familia, engadíronse fai unha década, dependencias para aloxamento. Rosenda Yáñez, herdeira do Pazo, estivo toda a súa vida vinculada a este Pazo e nel vive; conversamos con ela.

Rosenda Yáñez diante do seu hostal

Como presentarías Molinos de Antero e a súa orixe?

É un lugar que garda unha historia, unha historia pouco coñecida e é pena. Era a casa do apoderado da Orde de Malta, que á vez era o rexedor de Monforte, que á súa vez levaba os impostos sobre o tabaco, aquí no Camiño Real,… Eses impostos despois ían para a Casa Real. Tamén administraba aos Duques de Alba. A documentación do que se recadaba está aquí nos arquivos; entón a vixilancia era unha prioridade e creou un sistema de seguridade primitivo, antecedente dos sistemas de agora. As miras son como as cámaras de circuíto pechado. O pazo crece pensando en todas as artimañas e cousas que ten que ter, pensando na seguridade. Miras e portas para acceder aos sitios por lugares distintos e que o paso non interfira na vida da familia. Buscábase que houbese unha protección e ter lugares estancos, pasadizos. Todo se fai pensando no labor que vai realizar.

MIras Pazo Molinos de Antero / manuelgago.org

De pequena viñas ao Pazo para ver aos teus avós, cando es consciente do que isto significa e decides involucrarte?

Comezo a colaborar, a facerme cargo do Pazo e axudar ao meu avó, aos 23, 24 anos. Fago cortellos novos, unha cociña decente, un cuarto de baño completo… Vou loitando para dalo a coñecer e poñelo en valor. Entón pensaba que podían axudarme a soster isto, agora xa non o penso. Aquí, se non dá cartos como un parque temático, ao momento, as cousas non son interesantes.

O Pazo é hoxe a túa casa?

Aquí hai cousas das que non me podo desentender, non podo dicir que me dá igual que o arquivo podreza, ou que che pidan información e non dala. Síntome máis custodia que dona. Eu sempre xoguei aquí, para a min era o mellor, o misterio que este sitio tiña e o que me contaba o meu avó. Cando te fas maior deixas de ter esa fantasía e pasas a facerte preguntas máis concretas. E chega a responsabilidade, loitar por algo que economicamente non rende, que non podes darlle o enfoque que queres.

Molinos de Antero / guiarepsol.com

Cando se empezou a abrir ás visitas?

Fai 20 anos, organizámonos o meu pai e eu. Máis tarde abrín o hostal e xa non podía dedicarme ás visitas. Hoxe alugo dous apartamentos e 3 habitacións. Aquí te encargas de todo e do mantemento do Pazo; é moita dedicación; pero se elixes unha cousa logo tes que tentar estar contento e estouno, teño como certa simbiose coa casa.

Como chega o visitante de Molinos de Antero?

Algúns de casualidade, chaman particulares, veñen desde turismo. Hai de todo. O noso visitante adoita ser un turismo culto, disposto a botarse na visita 2 horas. Veñen colexios, pero máis de fóra de Monforte, grupos de amigos que organizan as súas viaxes. E despois fas amigos, gústalles e volven. Esta é unha casa viva. Para visitarnos poden contactarnos no correo info@pazomolinosdeantero.com ou nos teléfonos 676573563 – 982403072

Ribeira Sacra está a traer cada vez máis visitantes, nótao o Pazo e os aloxamentos?

Abrín en plena crise, abrín sen saber como ía ser, as casas de turismo rural funcionaban ben antes. Vas decatándote de como son as cousas, apúntaste nos centros de reserva. A Ribeira Sacra comeza a aparecer por todas partes, promociónase en todos os medios. Agora co reclamo de Ribeira Sacra cada ano é mellor, verase a partir de marzo, pero este inverno nótoo máis frouxo.

Cando te deixes de encargar disto, que pasará?

Non mo plantexo. O meu avó tampouco me dixo que me encargara disto, foi algo que saíu de min. É unha casa moi sorpresiva, é tan grande que sempre atopas cousas. Se non o adornas, só verías pingas, gretas, ruínas e contribucións. De momento seguirase adornando.

ÚLTIMAS

A Subida a Taboada inaugurará o Campionato Galego de Montaña os días 27 e 28 de abril

O vicepresidente da Deputación e deputado de Deportes, Efrén Castro, reuníuse este martes co...

Campaña de xuntanzas veciñais do PP de Monforte “para buscar solucións ás reclamacións de barrios e parroquias”

A Agrupación Municipal do Partido Popular de Monforte de Lemos comeza unha campaña de...

Charla do Plan Maior Seguridade o día 18 de abril en Chantada

A actividade forma parte do Plan Maior Seguridade, que promove o Ministerio do Interior...

Roteiro Literario para coñecer as localizacións da novela “A Boca do Monte”, en Quiroga

Preto dun cento de estudantes do IES As Lagoas de Ourense coñeceron o pasado...