O equipo que traballa no Castro de San Lourenzo, en Cereixa, dirixido polo arqueólogo, Xurxo Ayán, aproveitou a xornada para exhumar varias tumbas con restos humanos. Nunha das tumbas atopouse unha mandíbula, presumiblemente de muller, que conserva moitas pezas e hai tamén un cranio completo. Este tipo de achados permitirán facer unha comparativa con “Atilano” exhumado o ano pasado.
Todos os restos que van aparecendo no Castro de San Lourenzo desde que comezaron os traballos arqueolóxicos no verán do 2016 ofrecen importante información do modo de vida nesta zona nos séculos XI, XII e XIII. Entre outras cousas, este traballo permitirá afondar nas orixes da Ribeira Sacra como paisaxe simbólica nesta época.
O alcalde da Pobra do Brollón, Xosé Lois Maceda, e outros membros do equipo de goberno acudiron a ver os traballos. O alcalde falou da importancia do labor que se fai en San Lourenzo para “entender a nosa historia” e insistiu en que o Castro é ademais un recurso turístico fundamental para o concello.
A información completa dos achados de San Lourenzo este xoves en profundidade ás 22.00 h. en Xornal de Lemos.
