Os incendios da Pobra do Brollón –Saa– e Folgoso do Courel –Vilamor– xuntáronse e, segundo a información que pasaba esta mañá a Consellería do Medio Rural, a superficie calcinada ascende a unhas 7.500 hectáreas. A proximidade a núcleos rurais habitados fai que a situación de emerxencia continúe no grao 2.
A virulencia destes lumes fixo que cheguen xa a Quiroga, con perigo serio para a Devesa da Rogueira e aldeas como a emblemática Seara. O lume baixa xa polo Val da Seara e segundo soubemos por veciños do lugar varios núcleos foron xa evacuados: Ferramulín, Vieiros, Soldón, Visuña e mesmo a Seara. Só queda nesas aldeas a xente nova que está axudando na extinción.
Falamos con Séchu Sende hai uns intres e dinos que o lume está queimando a campa e o piñeiral da Lucenza, onde a mítica lagoa glaciar, e baixa cara a Seara. De momento pouco a pouco pero a situación é moi perigosa e non hai nin rastro de medios aéreos que serían necesarios para evitar que as lapas cheguen abaixo, ao núcleo habitado.
Séchu láiase da falta de medios aéreos e dos poucos terrestres. Estes últimos están facendo o posible para evitar, creando pistas e cortalumes, que o lume chegue tamén á Devesa da Rogueira. Neste senso tamén comenta, e difundiu nas redes sociais, que están atopando situacións de inoperancia como o atranco dun camión da UME na estrada que está impedindo o paso cara a Seara.
OUTROS LUMES
O lume de Folgoso do Courel, en Seceda, tamén segue en Situación 2 e leva calcinadas unhas 1.100 hectáreas.
En Quiroga está estabilizado o lume da parroquia do Nocedo, que queimou 15 hectáreas, e o de Outeiro aínda sen estabilizar chega ás 375 hectáreas afectadas.
