Ante a previsión de escaseza de auga pola seca, en aplicación do disposto na Ordenanza Fiscal nº 2.07ª reguladora da taxa polo subministro de auga, dende o Concello da Pobra do Brollón faise saber que non se poderá facer uso da auga procedente da subministración municipal para usos fóra do estrito consumo doméstico.
Deste xeito, queda prohibido o rego de hortas e xardíns, o uso da auga para encher piscinas particulares ou elementos semellantes, e tamén o lavado de vehículos, fachadas, patios, airas, etc.
O Bando municipal deixa claro que a auga procedente da rede municipal de abastecemento debe destinarse exclusivamente para o consumo doméstico e sinala que o concello controlará os consumos en edificios e instalacións municipais, así como tamén en espazos públicos en xeral vixiando as perdas que puidese haber na rede de abastecemento.
USO RESPONSABLE E SANCIÓNS
A comunicación administrativa do concello fai tamén un chamamento á responsabilidade para que todos/as os/as veciños/as realicen o máximo esforzo para o aforro da auga.
Aínda que o bando é de aplicación ás parroquias que contan con abastecemento de auga municipal, lembran aos veciños/as dos núcleos que contan con abastecemento propio que “a seca afecta a todos por igual e polo tanto é fundamental un uso responsable dun ben tan prezado e escaso”.
Toda infracción contra o ordenado neste Bando será sancionado segundo o disposto no artigo 3º da Ordenanza municipal.
