O pasado domingo declarábase un incendio con moita perigosidade e varios focos na parroquia de Santiago de Cangas, en Pantón, co agravante de estar moi preto das casas. Nas declaracións do goberno municipal ‘parece ser que o feito de ser provocado evita todo tipo de cuestionamento’, din os nacionalistas nun comunicado.

Se ben, reiteran a condena rotunda contra estes desalmados que poñen en perigo vidas humanas e o propio territorio, cren que ‘os lumes deben ser apagados no inverno, e é competencia de todos nós facermos pedagoxía, mais tamén cómpre unha xestión e ordenación do territorio que esixe unha planificación que non existe no concello de Pantón’, lembran dende o BNG.

Ante isto, o BNG explica que instará ao Partido Popular a asumir medidas de prevención e a levar a cabo unha política seria de xestión do territorio. “Unha mostra do desleixo e da falta de planificación en Pantón é que en todo o concello (129 km cadrados) só existe un punto hidrante para a recarga de auga. Así no incendio do pasado domingo o tempo de ida e volta a este punto retrasou moito o tempo de extinción”, expón o partido.

O viceportavoz do BNG no concello de Pantón, Roi López, confesa que os actuais lumes se propagan moi rápido e que iso complica as labores de extinción. Con todo, recalca que “estas son as consecuencias de décadas de políticas de desmantelamento do medio rural”. “Hai que planificar”, sentenza o viceportavoz.