Toda capela ten un valor, alén do relixioso, que a converte nun lugar destacado en cada aldea e parroquia. E teno, xa sexa como lugar de culto, aínda que sexa fixo discontinuo, xa sexa como elemento patrimonial do que presumir.

Na parroquia quiroguesa de Santa María de Quintá de Lor hai unha capela que, ademais do anterior, ofrece outro valor engadido para outorgarlle protección. Sobreviviu ao lume de 2021 que chegou a terras do Lor despois de saltar o río dende Ribas de Sil. As lapas chegaron a poucos metros da devandita capela, a Capela dos Remedios.

E aínda que a capela non ten actividade habitual, só se oficia nela nas festas do 8 e 9 de setembro, a veciñanza non quere deixala abandonar e decidiu acometer a restauración do seu retablo.

O cura do lugar, Jesús Río Ramilo, deu a coñecer esta obra salientando, por unha banda, a importancia de manter en pé este tipo de edificios relixiosos, e por outra, o valor da colaboración veciñal que fixo posible reunir os 4.700 € máis ive que custará a restauración. Outra colaboración que agradece o párroco é a cesión dunha estada por parte da empresa local quiroguesa Excavaciones Goni.

A restauradora é Mª Teresa López, que xa desmontou o retablo e o levou ao seu obradoiro para realizar os traballos.