A Deputación de Lugo organiza por cuarto ano consecutivo rutas gratuítas para conmemorar o Día da Transrománica, que se celebra o 9 de maio coincidindo co Día de Europa.
O programa, que arrinca a vindeira fin de semana en Antas de Ulla, ofrece un total de 17 visitas guiadas para poñer en valor o patrimonio románico da provincia ao longo de cinco xornadas no mes de maio.
As visitas faranse os días 4, 5, 9, 11 e 12 de maio e estarán dirixidas por un guía oficial de turismo. Cada itinerario conta cun máximo de 20 prazas, calculando que no conxunto do programa se oferten 340 prazas. As rutas non inclúen servizo de transporte, polo que os participantes deberán desprazarse por conta allea ata o lugar onde se desenvolve cada un dos itinerarios.
INSCRICIÓNS
Para participar nesta actividade é preciso realizar previamente as inscricións a través da páxina web http://inscricions.deputacionlugo.org ata completar o aforo. As persoas interesadas tamén poderán anotarse chamando aos teléfonos 982 260011 e 982 260234, ou contactando a través do correo electrónico romanico@deputacionlugo.org
A Deputación de Lugo ingresou no 2020 na Ruta da Transrománica, recoñecida oficialmente co selo de Itinerario Cultural do Consello de Europa, o que situou ao románico lucense no nivel máis alto de recoñecemento europeo.
PROGRAMACIÓN
Sábado, 4 de maio
– 10:30 horas. O románico nas Terras da Ulloa: Antas de Ulla.
– 16:30 horas. O románico nas Terras da Ulloa: Palas de Rei e Monterroso
– 16:30 horas. O románico no Xeoparque das Montañas do Courel
Domingo, 5 de maio
– 10:30 horas. A basílica de San Martiño de Mondoñedo.
– 11:00 horas. O románico de Chantada.
– 16:30 horas. Taboada: O románico menos coñecido.
– 17:00 horas. O Románico Urbano. Visita a unha importante vila medieval no reino de Galicia: Viveiro.
Martes, 9 de maio (Día da Transrománica)
– 11:00 horas. A Catedral de Lugo e a cidade medieval.
– 18:30 horas. Presentación da Guía Lugo Románico: Lugo, Terra Chá, A Mariña. No claustro da Catedral de Lugo.
Sábado, 11 de maio
– 10:30 horas. Monforte Monumental.
– 11:00 horas. O Románico no Camiño de Santiago: Portomarín e Paradela.
– 16:30 horas. Sarria: O Románico nos Hospitais Medievais de Peregrinos.
– 16:30 horas. O Saviñao: Románico con vistas ao Miño.
Domingo, 12 de maio
-11:00 horas. Tesouros do Románico Rural en Lugo e Guntín.
-11:00 horas. Santa María de Meira.
-11:00 horas. Pantón: A Ruta do Monacato Feminino.
– 16:30 horas. Dez séculos no concello de Sober: Dos Romanos ao Románico.
RUTA TRANSROMÁNICA
A Ruta Transrománica está recoñecida oficialmente co selo de Itinerario Cultural do Consello de Europa e trátase dunha das principais rutas culturais paneuropeas. Está integrada por rexións de 9 países da Unión Europea –Austria, Alemaña, Francia, Italia, Romanía, Portugal, Serbia, Eslovaquia e España– e abrangue un conxunto de monumentos románicos, moitos deles declarados Patrimonio da Humanidade pola UNESCO.
A provincia de Lugo é o terceiro lugar de toda España que forma parte desta entidade, despois de Castela e León, co mosteiro de Santo Domingo de Silos, e a cidade de Zamora, e conta na súa ruta con 10 igrexas de arte románica situadas noutros tantos concellos da Ribeira Sacra: o mosteiro do Divino Salvador, en Ferreira de Pantón; a igrexa de San Xoán da Cova, en Carballedo; a igrexa de Santa María de Nogueira de Miño, en Chantada; a igrexa de San Pedro de Ribas Altas, en Monforte de Lemos; a igrexa de San Facundo de Ribas de Miño, en Paradela; a igrexa de San Nicolás ou San Xoán, en Portomarín; a igrexa de Santa María de Torbeo, en Ribas de Sil; a igrexa de Santo Estevo de Ribas de Miño, no Saviñao; a igrexa de Santa María de Proendos, en Sober; e a igrexa de Santa María de Taboada dos Freires, en Taboada.
