O deputado do BNG na comarca, Iago Suárez, denuncia que estas obras para a mina de lousa recomezaron hai unhas semanas despois de anos de parálise e das queixas e alegacións por parte da veciñanza da parroquia de Montefurado e do propio Concello de Quiroga. “O Goberno galego ten que reconsiderar a súa posición o poñerse do lado da defensa do noso patrimonio sen ningún tipo de escusa”, advirte Suárez, que denuncia que a Xunta “como de costume, actuou con opacidade” con respecto á concesión que afecta a “unha das xoias máis dignas de protección do sur de Lugo”.
É por iso que reclama á Xunta do PP que revise a concesión que, segundo transcendeu, foi outorgada á empresa no ano 2019. A revisión faise imprescindible, argumentou, porque a mina afecta a un territorio considerado Ben de Interese Cultural, porque está na contorna do Camiño de Inverno e, ademais, porque afecta directamente até a catro núcleos de poboación que están a menos dun quilómetro da mina.
No mesmo sentido pronunciouse o portavoz do BNG en Quiroga e tenente de alcalde, Xosé Manuel Fernández, para quen o impacto da explotación da canteira que está comezando os traballos no lugar de Anguieiros “pode ser desastroso desde o punto de vista patrimonial e cultural” e pode ademais traer “graves prexuízos” para os núcleos rurais máis próximos (ademais dos Anguieiros, Os Covallos, Sexmil, Vilanuide e Enciñeira).
“Se queremos pór en valor como se merece o túnel romano de Montefurado, declarado BIC dentro da paisaxe protexida da Ribeira Sacra, e o potencial do Camiño de Inverno a Santiago non podemos permitir a explotación da canteira”, subliñou o tenente de alcalde.
Nas iniciativas rexistradas no Parlamento, o BNG lembra que o túnel foi construído hai arredor de 2.000 anos por orde do emperador Trajano e que aínda hoxe é considerado unha das maiores obras de enxeñaría en Galicia. Para extraer unha reserva de ouro que se encontraba no río Sil, os romanos furaron un monte realizando galerías horizontais e verticais nun pronunciado meandro que o Sil fai pouco antes de converxer con outro río, o Bibei. “Isto creou un túnel que aínda a día de hoxe se mantén e que representa un dos lugares máis dignos de conservación da Ribeira Sacra, a parroquia de Montefurado”, apúntase na iniciativa
