O Concello de Chantada conta cunha subvención da Axencia de Turismo de Galicia de 30.000€ para acometer melloras na contorna da igrexa de Santa María de Nogueira de Miño, templo declarado BIC (Ben de Interese Cultural) a finais do 2018 cando obtivo este recoñemento a paisaxe cultural da Ribeira Sacra.
Con todas as actuacións mellorarase a accesibilidade do templo e a seguridade destas instalacións que son un importante recurso turístico en Chantada polas súas pinturas murais e o espazo que ocupa a igrexa co Miño ao fondo.
Con esta subvención para melloras das infraestruturas turísticas, o Concello de Chantada quere fomentar a consolidación turística nas zonas rurais coa posta en valor da súa riqueza histórica, cultural, patrimonial e paisaxística. “Levamos anos tentando conseguir financiación para solucionar o tema das liñas aéreas na igrexa de Nogueira de Miño, así que poder executar esta obra é unha moi boa nova. Retiraranse os postes de formigón e instalaremos novas luminarias para ofrecer unha mellor imaxe do noso patrimonio”, explica o alcalde de Chantada, Manuel Lorenzo Varela que anuncia que desde o concello se traballa para acometer outras melloras na contorna desta igrexa.
