Os arqueólogos informarán sobre os achados e as conclusións extraídas nas cinco campañas arqueolóxicas levadas a cabo desde o ano 2021, a última este mesmo verán, que modificaron completamente a visión que se tiña sobre este lugar, considerado tradicionalmente de época medieval e que en realidade estivo ocupado desde o século IX antes de Cristo. A Xunta leva investidos máis de 86.000 euros nestas actuacións.

Os traballos das últimas semanas centráronse na restauración e acondicionamento da muralla do xacemento para reforzar a súa estabilidade e facilitar a súa comprensión. Ademais, a sondaxe realizada no interior permitiu recuperar un cento de pezas, maioritariamente fragmentos cerámicos e restos de pallabarro. Estes materiais reforzan a hipótese de que o asentamento contou con estruturas destinadas ao almacenamento de alimentos e posiblemente tamén a actividades metalúrxicas.

Os resultados desta campaña confirman unha vez máis a relevancia histórica de Penas do Castelo, habitado durante a Idade do Ferro e que presenta unhas magníficas defensas. A muralla que defendía o lugar destaca pola súa monumentalidade, cunha anchura duns 6 metros e unha altura conservada duns 4 metros, construída coa técnica da “pedra seca”, sen ningún tipo de argamasa.