A Rede Museistica Provincial prepara un encontro centrado na gastronomía como patrimonio cultural, que se celebrará os días 7 e 8 de abril no Pazo de Tor e no Museo Fortaleza de San Paio de Narla. A deputada de Cultura Iria Castro e a xerente da Rede Museística Provincial Encarna Lago presentaron o programa das xornadas, que contarán coa participación de profesionais do ámbito gastronómico, académico e cultural, como Lucía Freitas, cociñeira e propietaria de A Tafona (Compostela), que fará unha demostración de cociña con receitas recuperadas do arquivo da RMPL, Montse Castiñeira, cociñeira e propietaria de A Taberna de Montse (Órrea, Riotorto), Begoña Vázquez, cociñeira de O Regueiro da Cova, Ángeles Romero, catedrática do Pan e do Cereal da USC, o xornalista gastronómico Miguel Vila ou o historiador e escritor Xavier Castro, entre outros perfís.
A participación nas xornadas, gratuíta e con servizo de bus desde Lugo, require inscrición previa no correo electrónico concertacionsrmp@gmail.com. Dado que as prazas son limitadas, recoméndase facelo con antelación, tendo a flexibilidade de anotarse ao programa completo de dous días ou, se se prefire, a unha única xornada de xeito individual. As prazas para o encontro I que se celebrará en Narla, xa están esgotadas.
Programa gastronomía na Rede
ENCONTRO I: As mans invisibles. A muller na construción da identidade gastronómica
• Data e Horario: Martes, 7 de abril, das 15:00 ás 20:00 h.
• Localización: Museo Fortaleza San Paio de Narla (Xiá, Friol).
• Eixo Conceptual: Historicamente, a muller ocupou un papel secundario no recoñecemento público da gastronomía, malia ser a verdadeira gardiá da tradición culinaria e produtiva. Hoxe en día, nun contexto de alta visibilidade mediática onde o recoñecemento adoita recaer en figuras masculinas, a muller continúa a ser o motor principal de toda a cadea de valor. As estancias da Fortaleza de Narla, a súa lareira e o seu forno, serven de escenario para conectar coa memoria dun traballo esencial que foi mantido no anonimato e que hoxe reivindica un cambio de narrativa. Showcooking e degustación de receitas históricas recuperadas dos arquivos da RMP, seguida de mesa debate para rematar cunha dinámica participativa para recoller testemuñas orais e receitas tradicionais transmitidas por mulleres.
ENCONTRO II: Desigualdade e memoria. A comida como marcador de clase social ao longo da historia
• Data e Horario: Mércores, 8 de abril, das 10:00 ás 15:00 h.
• Localización:Pazo Museo de Tor (Monforte de Lemos).
• Eixo Conceptual: A alimentación funciona como un espello das desigualdades sociais; o que se comía e como se comía marcaba a posición social, o poder económico e o acceso aos recursos. O Pazo de Tor convértese nun escenario simbólico que dialoga coa idea do privilexio alimentario e as relacións de poder. O encontro explora as estruturas económicas e a división social do traballo, contrastando o mundo da nobreza coa subsistencia popular e analizando como os fluxos migratorios transformaron a nosa cultura alimentaria.
1ª Parte: Mesa redonda moderada por Leonardo Casado, con Xavier Castro, Miguel Vila Pernas, Rocío Carregal, Marcos Arufe, Begoña Vázquez, Esther Teixeiro, Xosé Figueroa e Ángeles Rivada. Eixes de debate: A dieta da nobreza e dos pazos fronte á campesiña, a alimentación en conventos, a pegada da inmigración e o camiño cara á democratización alimentaria.
2ª Parte: “Tres mesas, tres mundos”: Showcooking-degustación que recrea tres realidades sociais: a mesa pacega (carne de caza, viño, especias), a mesa popular rural (caldo, centeo, pataca) e a mesa da inmigración (millo, azucre, café).
Actividade final: Recollida de lembranzas de comidas da infancia e produtos de celebración do público asistente
