O deputado do BNG Iago Suárez formulou este martes na Comisión de Cultura unha pregunta na que reclamou á Xunta que actúe para a conservación da muralla medieval de Monforte, da que alertou do seu “precario estado”, mentres que o director xeral de Patrimonio lembrou que este ben “non é propiedade” do Goberno autonómico e, polo tanto, calquera actuación debe iniciarse “por instancias” dos propietarios. Na súa intervención, Iago Suárez apuntou que a muralla medieval de Monforte sofre un “importante deterioro”, afectada pola vexetación, fendas e algúns derrubamentos.
Dos séculos XII e XIII, conta cun perímetro de máis de 800 metros e varias torres e portas, lembrou Iago Suárez, que apuntou que a protección deste ben leva “décadas á espera”, mentres continúa o seu “deterioro”. O deputado do BNG recoñeceu que a formación é “consciente” dos problemas de titularidade deste ben, que ten unha parte privada, outra municipal e outra custodiada por Paradores, pero pediu á Xunta que “non baixe os brazos” e “trate de solucionar” a conservación dun ben importante para a historia de Galicia. “Vós, ao primeiro, baixades os brazos”, dixo Suárez.
Na súa quenda de réplica, o director xeral de Patrimonio Cultural, Ángel Miramontes, lembrou que, efectivamente, a muralla de Monforte “non é propiedade da Xunta”, senón que “ten varios propietarios”. Miramontes é o actual director xeral de Patrimonio Cultural da Xunta. “Non hai ningunha porcentaxe, ningún anexo, nada que sexa propiedade da Xunta”, apostilou. Así, apelou a que as partes que ostentan a súa propiedade sexan as que traballen na “súa conservación e posta en valor” e a que, se precisan apoio autonómico, fagan “unha solicitude” á Xunta.
En concreto, mencionou a Deputación de Lugo e o propio Concello de Monforte, así como o instrumento do Plan Especial de Protección do Conxunto Histórico-Artístico de Monforte. O conxunto histórico de Monforte está declarado Ben de Interese Cultural e a área de rehabilitación abrangue o recinto intramuros e zonas próximas aos accesos da muralla. “Estaremos encantados de complementar calquera vía de actuación por parte da Deputación ou do Concello de Monforte”, rematou.
