O pasado mércores día 21, diversos integrantes de ADEGA, da Sociedade Galega de Orinitoloxía, da Asociación Galega de Custodia do Territorio, de EQUO e da Asociación Cultural O Iribio realizaron unha acción reivindicativa no alto da Serra do Oribio, para dar conta dos traballos supostamente ilegais que se estiveron desenvolvendo de cara á construción dun parque eólico.
No terreo, representantes de ADEGA declararon que puideron comprobar como no alto do cordal da serra permanecen tres escavadoras e dous camións, a pesar de que as obras semellan interrompidas. Con todo, constataron que os traballos, levados a cabo nunha zona da especial valor ecolóxico, desfixeron un treito importante do Camiño Real do Bierzo a Monforte e con desbroces “salvaxes” acabaron con diversos exemplares de carballo anano (Quercus Lusitanica). Ao mesmo tempo, existen outros elementos de gran valor etnográfico moi próximos a estas obras, e que se ven ameazados por elas: a Medorra do Fial, as Ventas da Braña e do Retorno e o Portádego do Oribio.
Deste xeito, ADEGA convocou para o sábado 22 de xuño dúas concentracións ante as Casas Consistoriais dos concellos de Samos e Triacastela, para esixir que estas Corporacións Municipais non concedan autorización ou licencia municipal para ningunha obra en espazos da Rede Natura 2000, como sería o caso deste Parque Eólico Serra do Oribio. A primeira mobilización será ás 12 da maña en Samos e media hora máis tarde terá lugar a de Triacastela. Dende alí subirán á Serra do Oribio, a través de Abradelo, para rematar cunha andaina lúdica a pé e un xantar popular.
