As mobilizacións para pedir un transporte escolar digno no Courel aumentan e xa chegan á UE e a Xunta en Lugo. A ANPA do CPI Poeta Uxío Novoneyra decidiu realizar caceroladas diarias. Unha acción que comezaron esta fin de semana xunto coa realización de varias pancartas reivindicativas nas aldeas de Folgoso do Courel.
Ademais, anuncian que o vindeiro mércores 13 de xaneiro teñen programada unha concentración diante do edificio administrativo da Xunta de Galicia en Lugo, onde tamén realizarán unha cacerolada. De feito, a ANPA solicitou unha reunión coa inspección de Educación da provincia de Lugo, pero, «Aínda non recibimos resposta ao respecto», sinala a portavoz da ANPA Susana Costa.
QUEIXA EN EUROPA
Por outra banda, o Defensor do Pobo Europeo, ven de admitir a tramite a queixa de incumprimento de normativas , que presentou C@urel Vivo o día 20 de decembro de forma telemática. “Tras 20 días, aceptase a trámite e recadaran toda a información por parte da Consellería e dos afectados, para dar unha decisión”, apunta Óscar Carrete.
“A esta queixa, desde C@urel Vivo sumamos outra posta ó Tribunal de Contas Europeo, que audita o diñeiro investido desde a UE. Que a Xunta de Galicia estea a usar diñeiro Europeo para desmatelar o rural, e desde a UE sacasen os fondos FEDER, que veñen para o transporte; para facer unha discriminación positiva en zonas como a nosa”, engade.
