‘Reboiras. Acción e corazón’, a película documental sobre Xosé Ramón Reboiras Noia, máis coñecido como Moncho Reboiras, exhibirase este sábado 18 de xuño no Auditorio Municipal de Chantada.
O acto será presentado por Iago Suárez e contará coa intervencións de: Alberte Mera, director; Xosé Manuel Pavón, membro do grupo de Reboiras; e Xosé Lois García, veciño de Chantada que coñeceu a Moncho Reboiras.
Moncho Reboiras foi a última vítima mortal da ditadura franquista en Galicia e un referente mártir para o nacionalismo galego, motivo dabondo para que o director, Alberte Mera, decidise no seu día renderlle homenaxe con esta obra audiovisual.
A película combina 29 entrevistas de testemuñas con secuencias ficcionadas para ilustrar os momentos máis relevantes da vida deste sindicalista, político nacionalista galego e opositor á ditadura franquista.
