A Praza de España de Monforte de Lemos acolleu unha concentración en defensa da liberdade do pobo palestino este domingo, 22 de outubro. Unha faixa co lema “Paz e liberdade para Palestina” encabezaba esta acción de solidaridade na que se xuntaron algo máis de medio cento de persoas, algunhas delas chegadas de Valdeorras por ser a concentración de Monforte a máis próxima que tiñan.
A concentración na cidade do Cabe foi unha das 12 que había programadas en diferentes localidades galegas e estaba promovida por Mar de Lumes e apoiada por outras entidades galegas que defenden a liberdade do pobo Palestino.
Participaron representantes do BNG e outros colectivos asociativos de Monforte e Pantón, léndose un manifesto no que se pregaba o cese das agresións bélicas e unha solución política que poña fin a esta crise humanitaria.
